توصيل الكهرباء للأدوار المخالفة في شبرا الخيمة

حي غرب شبرا الخيمة – يقبل الآن طلبات توصيل الكهرباء حتى الدور السادس (بالأرضي) فقط .. لماذا وفي وقت سابق المباني المجاورة لي وصلت الكهرباء حتى الدور السابع وهو آخر دور في معظم مباني منطقة مدينة بدر السكنية وأنا تأخرت عن التوصيل في ذلك الوقت – يبقى اللي تأخر خلاص دلوقتي لايسمح له بالتوصيل – بمعنى كل وقت بقرارات مختلفة – والمشاهد للعيان أن الناس بتبني و توصيل الكهرباء معرفش إزاي ؟؟ أنا عاوز حد يفهمني أيه اللي بيحصل – الكهرباء بتدخل للناس دي إزاي – قالوا المباني مخالفة والأرض زراعية إزاي وهيه المنطقة كلها مخالفة ومبنية من غير ترخيص وفيها كهرباء وغاز تبقي إزاي حتى الآن في عرف الحكومة أرض زراعية – حولوها في سجلاتكم ياحكومة لأرض مباني واعملوا لها كردون لأنها بقت أمر واقع – يجب التعامل مع الواقع – مش ناس تبنى وتدخل لها الكهرباء وناس لأ ثم أن بيتي كله حتى الدور السادس (بالأرضي) فيه كهرباء – مش كفاية إن الواحد شقى وتعب واتغرب واشتغل ووفر مسكن لأولاده علشان مايتعبوش زي هوه ماتعب وكفاية عليهم يشوفوا أويدبروا تكاليف معيشتهم و الشقة دي هيه اللي هتسهل عليهم موضوع زي الزواج ومطلبناش حاجة من الحكومة وبنقول كفايه على الحكومة الحاجات العامة زي المواصلات والمرافق … إلخ – يبقى الحكومة تساعدنا وتوصل لنا الكهرباء مش كده ولا أيه؟؟

وفيه كمان طلب من حي غرب شبرا الخيمة وهو بما أن مدخل مدينة بدر السكنية ومدينة ابن الحكم هو من نهاية شارع كريستال عصفور فالرجاء الإستفادة من شارع كريستال عصفور وهو شارع كبير وفيه حارتين بجعله إتجاه واحد للمواصلات العامة التي تستخدم شارع أحمد عرابي وجعل ش أحمد عرابي هو الإتجاه الثاني والرابط بينهما هو (شارع الملاح) .. أو الإستفادة من شارع كريستال عصفور بتسيير المواصلات فيه وفي الإتجاهين لخدمة مدينتي بدر السكنية ومدينة ابن الحكم والإبقاء على شارع أحمد عرابي إتجاهين أيضاً لخدمة المناطق المتفرعه منه وهذا الإقتراح ممتاز للتخفيف عن شارع أحمد عرابي اللي من سنوات عديدة كتب صحفي عبارة لن أنساها عن هذا الشارع وقال ساعتها منتقدا إهمال المسئولين له ” لو أحمد عرابي عايش لتبرأ من إسمه بسبب رداءة هذا الشارع ” وأنا الآن أشاطر هذا الصحفي هذه العبارة وأقول أيضا “لو محمد علي عايش كان جعل شبرا الخيمة كلها قصور لأنه من جاور السعيد يسعد؟؟!!” وأضيف : الآن ليس للمسئولين عذر – الصرف الصحي اتعمل والغاز دخل – ارصفوا هذا الشارع واجعلوه زي  الشوارع المحترمة في مصر – بل ارصفوا كل الشوارع الرئيسية على الأقل في مدينة شبرا الخيمة – أنا عارف أن الحكومة شغاله كويس والله يكون في عونها .. بس نظره زياده شوية لشبرا الخيمة علشان الناس الطيبين المجتهدين اللي فيها – وبلاش التمييز بين المواطنين – أنا واثق أن هذا الشارع لو في الدقي أو المهندسن كان بقى شارع نموذجي ؟؟!! وللعلم في نهاية شارع عصفور أمام المدرسة الثانوية الصناعية يوجد مكان واسع جدا يصلح جراج لأتوبيسات النقل العام .. يعني الشوارع موجودة والجراج موجود ولايتبقى سوى القرار من المسئولين