هناك ظلم يقع على طلبة الدبلومة الامريكية , حيث تم تعديل درجات النيو سات الى %55 للجامعات الخاصة و %60 للجامعات الحكومية ,
يعنى ايه الدبلومة الامريكية؟
-يعنى تلات سنين ثانوية عامة مش سنة واحدة.
-يعن 4 سيمستر و 2 تيرم ومشروع فى كل مادة وكمان شوية امتحانات فى النص ومشاركة فى الحصة وحضور والتزام كل سنة، واى نقص فى حاجة هتقلل المجموع.
– يعنى امتحان عربى ودين وتربية وطنية مع الثانوية العامة وكمان تمتحن عربى ودين فى المرسة بتاعتك.
– يعنى امتحان مع منظمة السات الامريكية فى منتهى الصعوبة انجليزى ورياضيات لمدة 6 ساعات وامتحان الرياضيات معمول لطلبة طلية الهندسة جامعة عين شمس، طيب انا ادبى او علمى علوم مليش فى الهندسة مكنت ادخل علمى رياضة احسن، تساوينى بطلبة هندسة ليه. هوه كده لو مش عاجبك اشتكى. هوه النظام كده.
-يعنى امتحان السات لو جاوبت غلط يشيل من درجات الصح اللى انت عملتها، يعنى لو حليت 2 او 3 او 4 غلط يلغى لك واحدة صح انت مجاوب عليها – طيب ليه تلغى حاجة صح انا عاملها – هوه كده مش عاجبك اشتكى.
– يعنى امتحان السات مختلف كل واحد عن اللى جانبه او اللى امامه او اللى وراه. يعنى مينفعش تغش لانك لو غشيت هتغش غلط، هو النظام كده.
– يعنى امتحان السات لو فكرت تبص جانبك هتلغى الامتحان للجنة كلها ويتلغى امتحان السات وتروًّح.
– يعنى منظمة السات لو لقت قطعة الانشاء (الايسى) متشابهه ولو فى لجنتين مختلفتين – يتم تاجيل نتيجة المدرسة وقد يلغى النتيجة نهائياً وبتحصل كل امتحان يلغو نتيجة كام مدرسة – مش مهم ميمتحنو تانى انشالله محد حوٍّش.
– يعنى لازم تسجل فى امتحان السات قبل ميعاد الامتحان بفترة طويلة احسن تترمى فى مدرسة فى الاسكندرية او المنصورة او اى محافظة مش عارف فين، او تبات ليلة فى المحافظة دية علشان الامتحان بدرى ولو اتاخرت عن ساعة قبل ميعاد الامتحان هيروح عليك الامتحان، هوه النظام كده.
– يعنى لازم علشان تسجل فى امتحان السات انك تطلع جواز سفر ويكون سليم وغير منتهى الصلاحية ولو نسيت تجيبه معاك يوم الامتحان ومعاك حتى صورة منه، وانت ابن السفير الامريكى فى مصر مش هتدخل الامتحان.
– يعنى لازم تعمل تسجيل فى منظمة السات ببياناتك وصورة حديثة بشروط معينة، وتحافظ انك متتغيرش عن الصورة، يعنى متتخنش او تخس او تلبس نظارة او تربى شعرك او ذقنك، علشان لو فيه اى تغيير مش هيدخلوك الامتحان.
بالنسبة لوضع مصر عند منظمة السات
– تضع منظمة السات مصر فى القوائم السوداء منذ اكثر من سنتين مش عارف ليه؟، وكل امتحان تلغى نتيجة بعض المدارس وتؤجل نتيجة مدارس اخرى، ودايما نتيجة مصر محدش عارف عنها حاجة.
– تدّعى منظمة السات ان الامتحان فى مصر بيتسرب بالرغم من ان الامتحان ياتى من امريكا قبل الامتحان بيوم وتحت رقابة خاصة بمنظمة السات، والمراقبيين والمشرفين فى كل المدارس جايين من امريكا، واى مدرسة لاتلتزم بالقواعد تشطب فورا قبل الامتحان.
– وكان فيه اقتراح بالغاء الامتحانات نهائيا من مصر واى حد عايز يمتحن سات يسافر يمتحنه بره مصر.
كل حرقة الدم ديه وعايزين برضه تعَّلو النتيجة الى 60% للقبول؟
– محدش عارف المعاناة اللى بيعانيها طلبة واهالى الدبلومة الامريكية الا اللى متورطين فيها. مش كفاية علينا مذاكرة ثلاث سننين متواصلة علشان نجيب مجموع عالى لان الجامعات بتاخد الاعلى بداية من 90}% متوسط الثلاث سنوات
– وكمان بتلزمنا بالتسلسل الدراسى من سنة اولى ابتدائى حتى السنة النهائية من الصف الدراسى الثالث الثانوى ويكون مختوم من الوزارة بختم النسر، ولو رحت اكتر من مدرسة لازم تلف عليهم كلهم وعلى اداراتهم التعليمية.
– الدبلومات الامريكية والشهادات المعادلة الاخرى هى مع آخر مرحلة فى التنسيق، وبيسيبوك حتى لو جايب اكثر من 95% زى اللى فى المرحلة الاولى.
– انت طول الوقت بتتصارع مع المدرسة والوزارة ومنظمة السات والمجلس الاعلى للجامعات والجامعات لان كل حاجة منهم بتطلب طلبات قد تتفق او تتعارض مع الاخرى.
كل ده ويقولوا ان الدبلومة الامريكية اسهل من الثانوية العامة… طيب احكموا انتوا
– طبعا احنا متكلمناش عن الكتب، اصل الكتب فى الدبلومة الامريكية مش موجودة فى القاهرة كلها غير عند مكتبة واحدة فقط، يعنى لو المكتبة دى قفلت، يبقى تقول يارحمن يارحيم.
وبالنسبة لنظالم السات الجديد مكنش فيه كتب اصلا، لغاية لما جت من بره، والحجز عليه كان بالاسابيع.
– بلاضافة لكل ده، المدرسين طبعا بالحجز ومش موجودين وفيه ندره فى الحصول عليهم سواء فى المدارس او دروس خاصة او السنترز، ولازم تحجز من الاجازة علشان مش هيرضوا يدخلوك – او ممكن تروح عند مدرسين انجليزى ورياضيات ملهمش علاقة بالدبلومة الامريكية، بس مش عارفين النتيجة ساعتها هتكون ايه.
