استهانة طبيب بمستشفى الشروق العامرية بصحة طفلي

السلام عليكم ورحمة الله ،،
بيقولوا الاطباء ملائكة الرحمه ،، بس للاسف في منهم كتير ملائكة عذاب ،، معدومي الضمير ،، فاقدين للاحساس والآدميه ،، وده اللي حصل معايا امبارح لما رحت اكشف علي ابني حمزه في مستشفي محترمه هي مستشفي الشروق بالعامرية بمحافظة الاسكندرية ، عند دكتور كنت فاكره راجل محترم هو اسمه ضياء اخصائي انف واذن وحنجره ، بس للاسف طلع من الصنف اللي معندهوش رحمه ،،،،،،
اللي حصل اني ذهبت للمستشفي اكشف علي ابني حوالي الساعه 6.30م ، ولما جيت اقطع تذكرة كشف الموظف رفض بحجة ان الحجز آخره الساعه 4 ، انا طلبت منه يدخلني للدكتور استأذنه يكشف علي ابني بعد كل الناس اللي موجودين لما يخلصوا كشف ،، وبالفعل دخلت للدكتور ضياء وقلتله ان انا معرفش ان الحجز الساعه 4،، وان انا بخلص شغل الساعه 6 ، وان ابني تعبان ومحتاج اكشف عليه ضروري علشان مش قادر ياخد نفسه ،، قالي انا شغال من بدري ومش ذنبي ان انت جاي متأخر ،، وان هو جعان ومتغداش ،، رديت عليه وقلتله يا دكتور اعتبر انه حاله طارئه وبعدين ده طفل عمره سنه ومش قادر يستحمل ،، قالي مش شغلي ،، انا عايز ارتاح…………
كشف علي طفل عمره سنه هو اللي هيتعب سيادته……
هي دي الرحمه….. ؟
هي دي الانسانيه….. ؟
والله انا مش ببالغ في الكلام ،، انا عايز كل اللي قرأ الرساله دي يقوللي لو هو مكاني كان اتصرف ازاي مع الدكتور عديم الرحمه ده…… ؟
وآسف علي ازعاجكم………
محمد مصطفى عبد الخالق