شكاوي المواطنين المصريين

شباب قرية الحجر مركز اطسا محافظة الفيوم

بداية كل عام وحضرتك بخير بمناسبة عيد الاضحي وألف مبروك علي توليك منصب محافظ الفيوم وفقك الله لما فيه الخير وسدد علي طريق الحق خطاك سيادة المحافظ نريد من حضرتك التواصل المستمر مع المواطنين علي أرض الواقع هذا أولا ثانياً أحدث حضرتك عن قرية عانت كثيراً من الإهمال الحكومي الفتره السابقة وكل محافظ قبل حضرتك نعرض عليه مشاكلنا يقول ازاي دي لازم تنفذ ويصدر أوامره لمرؤسيه بالتنفيذ لكن في الآخر يطلع كلام كله فولتارين مسكن وأقسم بالله ما فيه حاجه بتتنفذ خالص ثالثاً مشاكل القريه سيادة المحافظ تتمثل في الآتي :
1 – مصرف الباسل وكم عانينا منه مراراً وتكراراً وفيه ناس جت عاينت المصرف وشافوه علي أرض الواقع وقالوا ما ينفعش يتساب كده لازم يتغطي لأن خطره كبير علي المواطنين المهم تم تغطية 200 متر وتوقف العمل والباقي حوالي 450 متر بالله عليك سيادة المحافظ ارحمونا وغطولنا المصرف .
2- مركز الشباب انت عارف يا سيادة المحافظ والله العظيم لو شفتوا هتقول ده مقلب قمامة مش مركز شباب قد وعدنا سيادة المحافظ السابق بتطوير المركز وعمل ملعب نموذجي لكن كالعاده الفولتارين اكتر حاجه متوفره في البلد عايزين مركز شباب يا سيادة المحافظ .
3- مياة الشرب حدث ولا حرج عنها اشتكينا اكتر من مره قولنا فيه خط قريب مننا عايزين نتوصل عليه احسن من عذاب المرشح الحالي وقد وعدنا أكثر من مرة ولكن الفولتارين حاضر برضه عايزين توصيله بالخط التاني يا سيادة المحافظ .
4- الصرف الصحى تم تنفيذ الصرف الصحي بالقرية في التسعينيات ولكن اتنفذ في نصف القريه والنصف الآخر ما فيش والمياه الجوفية طافحه في البيوت وقد وعدنا بإدراج القريه في الخطه وأرسلت الوحدة المحلية الخرائط اللازمة لذلك علي أمل التنفيذ ولكن ما فيش صرف صحي اتعمل .
سيادة المحافظ هو كتير علينا أننا تتحقق مطالبنا كتير علينا إننا نطالب بحقوقنا عارفين إن البلد ظروفها تعبانه لكن ما ينفعش واحد يأكل لحمه والتاني مش لاقي رغيف حاف يأكل بيه سيادة المحافظ إحنا اتهرينا مسكنات عايزين جراحة عاجلة حتي يلتئم الجرح عايزين تواصل من حضرتك علي أرض الواقع تيجي تشرفنا في القريه وتشوف بنفسك علي أرض الواقع أو نيجي نزور حضرتك ويكون الكلام أبلغ سيادة المحافظ عارفين تقلنا علي حضرتك لكن هنعمل ايه نصيبنا كده .
دمت سيادة المحافظ في أمان الله وحفظه ورعايته ووفقكم الله لما فيه الخير وسدد علي طريق الحق خطاكم.

مقدمة لسيادتكم مجموعة من شباب قرية الحجر — مركز اطسا محافظة الفيوم .
عنهم إبراهيم خميس ابوحمد
مأمور ضرائب عامه بمامورية ضرائب أطسا
محمول / 01095986461

الدولة: مصر | المنطقة او المحافظة: الفيوم

اضيف بتاريخ: Thursday, September 22nd, 2016 في 03:47

كلمات شكاوي المواطنين: , , ,

اترك تعليقاًً أو حلاً لهذه الشكوى


إخلاء مسؤولية: موقع شكاوي المواطنين غير تابع لاي جهة حكومية في اي دولة، ولا يتحمل موقع شكاوي وهموم المواطنين باي شكل من الاشكال المسؤولية عما ينشر من شكاوي على صفحاته، وكل ماهو منشور وما يتم نشره يقع تحت طائلة المسؤولية الادبية والقانونية لمقدم الشكوى وكاتبها سواء ورد في التعليقات او في محتوى الشكاوي نفسها