شكاوي المواطنين المصريين

ارحمو أولادنا من استغلال مراكز الشباب واسعارها

الى كل من يهمه الأمر الموضوع ببساطة شديدة واخص بالذكر مركز شباب مدينة العبور، انا عندى ٤٧ سنة ومن الجيل الى اتربى رياضيا فى مركز شباب، غير ان مدرستى الاعدادية كانت تجريبية رياضية، وعلى حسب معرفتي بمراكز الشباب ان فكرتها نشأت على اتاحة الفرصه للطبقه المتوسطة، والاقل من الشعب الغير قادر على الاشتراك بالنوادى المختلفه، والمفترض ان الأسعار داخل مراكز الشباب تكون رمزية، لكن اسعار مراكز الشباب تقترب من اسعار النوادي.

ده ظلم مع العلم ان من مراكز الشباب خرجت أشهر واحرف لاعبين عرفهم التاريخ، انا شخصيا من مركز شباب لنادى السكه الحديد الى اتحاد الشرطة.

انا عايز اضرب مثل بسيط انا عندى ولد وصل داخل مركز الشباب لمرحلة متقدمة جدا فى السباحة يعنى ميداليات ذهبية وكأس الاندية، وللأسف الشديد من حوالى سنة وقفت التدريبات.

السؤال ليه انا هجاوب هنعمل حسبة بسيطة .. احمد بيروح المركز ٤ مرات فى الاسبوع بند المواصلات ١٥ جنيه فى المره وعندنا ٣٠٠ جنيه اشتراك يعنى اشتراك ومواصلات تقريبا ٦٠٠ جنيه، مش هتكلم على مصاريف أدوات السباحه الى هلكتنا.

طيب الاغرب اى بطولة بيخشها المفروض انها تبع مركز شباب تابع لوزارة تبع الدولة، والله بيدفعونى تمنها بدفع تمن بطوله ابنى بيمثل فيها مركز شباب، والى مش هيدفع ميروحش. يعنى الموضوع ليس للاحرف ولكن للى يدفع.

طيب فى اختبار الاستار علشان ابنى يختبر كنت بدفع فى كل اختبار تقريبا ٥٠٠ جنيه ده غير الكباتن الغير مؤهلة، وإهمال الموهوبين فى مختلف الرياضات، اقسم بالله المراكز مليانه كفاءات لكن مهملة، ليه علشان كل مدرب عامل مدرسة خاصه يعنى المركز بقى مكان يستقطب منه زبائن.

والله انا اعرف واحد ماجر حمام سباحة فى مدرسه، انا ابنى مثلا كنت بسمع من اكتر من مدرب سباحه أصدقاء انه مشروع بطل لكن مهمل وغيره كتير.

ملخص كلامى رجاء الاهتمام بالمراكز من كل النواحي لاتاحة الفرصه لغير القادرين ماديا والناس الى بتحاول تربى ولادها بطريقه سليمة لكن ليس عندهم امكانيات، اقسم بالله الشريحه دى معندهمش غير اختبارين الأول مراكز الشباب والانشغال بالرياضه او الشارع والانشغال بالصياعه والمشاكل.

فى الاسره المكونه من ولدين مش هقول اكتر انه يصرف عليهم فى مركز شباب بين مواصلات واشتراك حوالى ١٢٠٠ جنيه شهريا، والله انا اعرف أسر مكونه من ٣ او ٤ اولاد لغو الاشتراك وكان مصيرهم الشارع، والاغرب ان علاقتهم مع باقى اصحابهم بقت سيئة جدا لأنهم كانو متفوقين رياضيا جدا، لكن النتيجة احقاد ونقم على المجتمع.

فين دعم المواهب فين دور الوزارة فى الرقابه والدعم.

للعلم الأعضاء فى المركز كلهم عاملين زى القنابل واقسم بالله لو هنوصل صوتنا للرئيس هنوصله لكن كفايه كده، مش عايزين نحس اننا سلعه تباع ويستكسب منها مركز الشباب هدفه خدمتنا على قدر امكانياتنا….بعتذر للاطاله وأرجو أن صوتى يوصل

الدولة: مصر | المنطقة او المحافظة: القليوبية

اضيف بتاريخ: Thursday, June 10th, 2021 في 10:18

كلمات شكاوي المواطنين: , , , , ,

اترك تعليقاًً أو حلاً لهذه الشكوى


إخلاء مسؤولية: موقع شكاوي المواطنين غير تابع لاي جهة حكومية في اي دولة، ولا يتحمل موقع شكاوي وهموم المواطنين باي شكل من الاشكال المسؤولية عما ينشر من شكاوي على صفحاته، وكل ماهو منشور وما يتم نشره يقع تحت المسؤولية الادبية والقانونية لمقدم الشكوى وكاتبها سواء ورد في التعليقات او في محتوى الشكاوي نفسها